Tipsernermit lottornermillu iluanaarutinit agguaassisarneq pillugu Inatsisartut inatsisaat nr. 13, 11. november 2000-imeersoq.
Kapitali 1.
Agguaanneqartarnerat§ 1. Pinnguaatit, eqqorniaasitsinerit eqquiniunnerillu ilaat pillugit inatsit naapertorlugu ani-ngaasat ukiumoortumik Kalaallit Nunaanni atugassanngortinneqartartut §§ 6-7 malillugit aqutsinermut aningaasartuutit § 3-lu malillugu tapiissutaasinnaasut ilanngaatigereerlugit Naalakkersuisut agguaattassavaat tamanut iluaqutaasussamik siunertanut makkununnga:
1) taakku 50%-ii timersornernut tamanit peqataaffigineqarsinnaasunut, innarluutillit utoqqaallu timersornerat ilanngullugu,
2) taakku 9,1%-ii piukkunnaatillit pikkorinnerillu timersornerinut,
3) taakku 13,6%-ii meeqqat inuusuttullu pillugit siunertanut, aamma
4) taakku 27,3%-ii tamanut iluaqutaasussamik siunertanut allanut, ilanngullugit kulturimut tunngasunut, inunnik qaammarsaanermut, nappaatinik akiuiniarnermut pinaveersaartitsinernullu, inooqatigiinnermut tunngasunik siunertaqartunut, asimiisitsinissanut siunertaqartunut aamma tamanut iluaqutaasussamik ilisimatusarnermut.§ 2. Atugassanngortitat § 1 nr. 1-imi taaneqartut Kalaallit Nunaanni Timersoqatigiiffiit Kattuffiannut tunniunneqassapput, taassumalu siunertap iluani agguaasseqqinneq isumagissavaa inatsisartut inatsisaanni matumani taannalu tunngavigalugu malittarisassiani aalajangersakkat naapertorlugit.
Imm. 2. Atugassanngortitat § 1, nr. 2-mi taaneqartut Team Grønlandimut tunniunneqassapput, taassumalu siunertap iluani agguaasseqqinneq isumagissavaa inatsisartut inatsisaanni matumani taannalu tunngavigalugu malittarisassiani aalajangersakkat naapertorlugit.
Imm. 3. Atugassanngortitat § 1, nr. 3-mi 4-milu taaneqartut qinnuteqartoqareerneratigut Naa-lakkersuisunit agguaanneqassapput.
Imm. 4. Imm. 1 aamma imm. 2 naapertorlugit Kalaallit Nunaanni Timersoqatigiiffiit Kattuffiata aamma Team Grønlandip aqutsinissaannut maleruagassat Tipsernermit iluanaarutinik agguaassisartut inassuteqaateqareerneratigut Naalakkersuisut aalajangersassavaat.§ 3. Aningaasaateqarfiit suliniaqatigiiffiillu allat tamanut iluaqutaasussamik siunertanut tipsernermit lottornermillu iluanaarutinit agguaassisartut aningaasaleeqataaffiginissaat pillugu Naalakkersuisut isumaqatigiissuteqarsinnaapput § 1. nr. 1-imi taaneqartutut tamanut iluaqutaasussamik siunertanut tapiissuteqarsinnaanissaq illuatungiliullugu.
Kapitali 2.
Tipsernermit iluanaarutit pillugit maleruagassiisartussatut suleqatigiissitaliaq§ 4. Naalakkersuisut pilersissavaat Tipsernermit iluanaarutit pillugit maleruagassiisartussatut suleqatigiissitaliaq arfinilinnik ilaasortalik taamallu amerlatigisunik sinniisussalik ukunannga toqqarneqartunik:
1) Kultureqarnermut naalakkersuisoq.
2) ilinniartitaanermut naalakkersuisoq.
3) ilisimatusarnermut naalakkersuisoq.
4) isumaginninnermut naalakkersuisoq.
5) peqqinnissamut naalakkersuisoq.
6) avatangiisinut pinngortitamullu naalakkersuisoq.
Imm. 2. Siulittaasoq, inatsisilerinermik ilisimaarinnittuusussaq, kultureqarnermut naalakkersuisumit toqqarneqassaaq. Ilaasortaannaat ilaat naatsorsuuserinermik ilisimasaqartuussaaq naalakkersuisunullu ilaasortanit imm. 1-imi taaneqartunit paarlakaajaattumik toqqarneqartassalluni, siullermeersumik ilinniartitaanermut naalakkersuisumit.
Imm. 3. Inatsisartunut nutaamik qinersisoqareerpat maleruagassiisartutut suleqatigiissitaliaq pilersinneqassaaq.
Imm. 4. Tipsernermit iluanaarutit pillugit maleruagassiisartussatut suleqatigiissitaliaq § 2, imm. 4, § 10, imm. 1 aamma § 12 naapertorlugit allaffissornikkut aqutsinermut, kukkunersiuinermut naatsorsuuserinermullu kiisalu tapiissutisinissamut piumasaqaatinut atatillugu Naalakkersuisunut siunnersuisartuullunilu inassuteqartartuuvoq.§ 5. Tipsernermit iluanaarutit pillugit maleruagassiisartussatut suleqatigiissitaliami ilaasortat taakkuluunniit sinniisussaat tamarmik suleqatigiissitaliap ataatsimiinnerini taaseqataasinnaatitaapput. Taasinerit naligiissagaluarpata siulittaasup taasinera aalajangiisuussaaq.
Imm. 2. Tipsernermit iluanaarutit pillugit maleruagassiisartussatut suleqatigiissitaliap suleriaasissani nammineerluni aalajangersassavaa.§ 6. Allatseqarnikkut ikiortissanik Tipsernermit iluanaarutit pillugit maleruagassiisartussatut suleqatigiissitaliamut Naalakkersuisut atugassaqartitsissapput.
§ 7. Ilaasortat taakkulu sinniisussaat Tipsernermit iluanaarutit pillugit maleruagassiisartussatut suleqatigiissitaliap ataatsimiinnerini peqataanermut atatillugu ajunngitsorsiassat aningaasartuutaanerusullu Inatsisartunut, Naalakkersuisunut il.il. ilaasortat aningaasarsiaqartitaanerat il.il. kiisalu Landsrådimut, Inatsisartunut, Naalakkersuisunut il.il. ilaasortaasimasut soraarnerussutisiaqartinneqarnerat pillugit inatsisartut inatsisaat naapertorlugu aningaasalerneqartassapput.
Kapitali 3.
Tapiiffigineqarsinnaanermut piumasaqaatit§ 8. Tapiiffigeqqulluni qinnuteqartoq Kalaallit Nunaanni najugaqartuussaaq.
§ 9. Naalakkersuisut, Kalaallit Nunaanni Timersoqatigiiffiit Kattuffiata aamma Team Grønlandip aningaasaliissuteqarnissaq ataatsimik arlalinnilluunniit piumasaqaasersinnaavaat, ilaatigut uppernarsaammik aalajangersimasumik saqqummiussinissaq piumasaqaatigisinnaallugu.
Imm. 2. Tapiiffigeqqulluni il.il. qinnuteqaatip suliarineqarnissaanut atugassamik Naalakkersuisut, Kalaallit Nunaanni Timersoqatigiiffiit Kattuffiat aamma Team Grønland paasissutissanik naleqquttunik pisortat oqartussaasuinit pissarsiniarsinnaapput.§ 10. Tapiissutinik pissarsisut naatsorsuusiussapput Tipsernermillu iluanaarutit pillugit maleruagassiisartussatut suleqatigiissitaliap inassuteqaateqareerneratigut maleruagassat Naalakkersuisut aalajangersagaat malillugit naatsorsuutit kukkunersiortissimassallugit.
Imm 2. Naatsorsuutit kukkunersiukkallu naliliiffiginiarlugit Naalakkersuisut, Kalaallit Nunaanni Timersoqatigiit Kattuffiat aamma Team Grønland paasissutissanik naleqquttunik pisortat oqartussaasuinit namminersortunillu pissarsiniarsinnaapput.§ 11. Tapiissutit akuerineqarsimasut utertillugit akileqquneqarsinnaapput qinnuteqartoq eqqunngitsumik paasissutissiisimappat, tapiissuteqarnissamut piumasaqaataasut naammassineqarsimanngippata imaluunniit suliniut sinneqartooruteqarfiuppat.
§ 12. Tapiiffigitinnissamut piumasaqaatasut ersarinnerusut Tipsernermit iluanaarutit pillugit maleruagassiisartussatut suleqatigiissitaliap inassuteqareernerisigut Naalakkersuisut aalajangersassavaat.
Kapitali 4.
Atulerfia§ 13. Inatsisartut inatsisaat ulloq 1. januar 2001 atulerpoq. § 4, imm. 3 taamaattoq aatsaat atortuulissaaq inatsisartunut nutaamik qinersisoqareerpat. Tipsernermit iluanaarutit pillugit maleruagassiisartussatut suleqatigiissitaliaq pilersinneqassaaq siullermik 1. januar 2001.
Imm. 2. Tapiissutinik pissarsinissamut tunaartarisassat atuuttut atuutiinnassapput inatsisartut inatsisaat manna malillugu aalajangersakkanik nutaanik taarserneqarnissamik tungaanut.
Namminersornerullutik Oqartussat, ulloq 11. november 2000
Jonathan Motzfeldt/
Lise Lennert
Isumaliutissiissut (Aappassaaneerinninneq)
Akissuteqaat (Aappassaaneerinninneq)
Pingajussaaneerinninnermut allannguutissatut siunnersuut (akuerineqartoq)